ഓം സർവ്വ മംഗള മംഗല്യേ · 

ശിവേ സർവ്വാർത്ഥ സാധികേ · 

ശരണ്യേ ത്രയംബകേ ഗൗരി · 

നാരായണീ നമോസ്തുതേ 

ഒൻപത് വയസുള്ള ബാലിക രൂപത്തിലുള്ള ബാലഭദ്ര ആണ് പ്രധാന പ്രതിഷ്ഠ. സർവ്വ ഐശ്വര്യപ്രാദായിനിയും വിദ്യാദേവതയുമായ ശ്രീ ബാലാപരമേശ്വരിയെ ആരാധിക്കുന്നതിലൂടെ വിദ്യാഭിവൃദ്ധിയും ബുദ്ധിശക്തിയും കലാസിദ്ധിയും സർഗ്ഗ വൈഭവവും ഭക്തർക്ക് പ്രാപ്തമാകും എന്നാണ് വിശ്വാസം. ധനുമാസത്തിലെ തിരുവാതിര ദിനത്തിലാണ് ഭാഗവതിക്ക് ആറാട്ട്. നവരാത്രി, മകം തൊഴൽ, പ്രതിഷ്ഠ ദിനം, തൃക്കാർത്തിക , ശിവരാത്രി , മകരച്ചൊവ്വ,ഓണം , വിഷു, ശ്രീകൃഷ്ണജയന്തി    തുടങ്ങിയവയാണ് വിശേഷ ദിനങ്ങൾ. എല്ലാ ചൊവ്വാഴ്ചകളിലും അർച്ചനയും അന്നദാനവും നടത്തിവരുന്നു.

ഓം കാളീം മേഘസമപ്രഭാം ത്രിനയനാം 

വേതാള കണ്ഠസ്ഥിതാം 

ഖഡ്ഗം ഖേട കപാല ദാരിക ശിരഃ കൃത്വാ 

കരാഗ്രേഷു ഭൂതപ്രേതപിശാച മാതൃസവിതാം 

മുണ്ടസ്രജാലംകൃതാം വന്ദേ ദുഷ്ടമസൂരികാദി 

വിപദാo സംഹാരിണീമീശ്വരീം 

നൂറ്റാണ്ടുകളായി നാട്ടുകാർ ആരാധിച്ചിരുന്ന ഭദ്രകാളിയെ പ്രശ്നവിധിയെ തുടർന്ന് പുതിയ ക്ഷേത്രം നിർമിച്ചുകൊണ്ട് പ്രതിഷ്ഠിക്കുകയുണ്ടായി. സൗമ്യ ഭാവത്തിൽ സ്ഥിതി ചെയ്യുന്ന ഭദ്രകാളി ഭക്തർക്ക് സർവ മംഗളങ്ങളും നൽകി വിരാജിക്കുന്നു. ഉത്സവത്തോടനുബന്ധിച്ചു എല്ലാ വർഷവും ഭഗവതിക്കളം നടത്തിവരുന്നു. ധനുമാസത്തിലെ തിരുവാതിരക്ക് നടത്തുന്ന വലിയകുരുതി തർപ്പണത്തോടെയാണ് മഹോത്സവത്തിന് കൊടിയിറങ്ങുന്നത്.

      “വിദ്യകൊണ്ട് പ്രബുദ്ധരാവാൻകഴിയൂ” അതിന് ക്ഷേത്രങ്ങളോടൊപ്പം വിദ്യാലയങ്ങളും ഉണ്ടാകണം. നമ്മുടെ ഇഷ്ടദൈവങ്ങളെ പൂജിക്കുവാനും, ആരാധിക്കുവാനും വിലക്കില്ലാത്ത സ്വതതമായ നമ്മുടേതായ ആരാധനാലയങ്ങളോടൊപ്പം അക്ഷരനിധികളായി വിദ്യാഭ്യാസ സ്ഥാപനങ്ങളുംഉയരണം. ഈ ഉപദേശങ്ങൾ ഒരു വെളിപ്പാടുപോലെ സ്വീകരിച്ചവർ ഒരു കൂട്ടായ്മ ഉണ്ടാക്കുവാൻ ശ്രമിച്ചതിന്റെ ഫലമാണ് നാം ഇന്നു കാണുന്ന ഡി.ഡി. സഭ. “ധർമ്മാർത്ഥദായിനിസഭ” എന്ന് നാമകരണം ചെയ്തത് ഗുരുവായിരുന്നു. മഹാഗുരുവിനെ വിദ്യാദേവതയുടെ കിഴക്കു വടക്കു ഭാഗത്തായി മനോഹരമായ മണ്ഡപത്തിൽ പ്രതിഷ്ഠിച്ചിരിക്കുന്നു. എല്ലാ മാസവും ചതയ പൂജയും അന്നദാനവും നടത്തിവരുന്നു.  ശ്രീനാരായണജയന്തിയും മഹാസമാധിയും ഡി.ഡി. സഭ ഉപചാരപൂർവം കൊണ്ടാടുന്നു. ചതയ പൂജയും ഗുരുപൂജയാണ് പ്രധാന വഴിപാട്.