സാധാരണക്കാർ താമസിച്ചിരുന്ന കരിമ്പാടം എന്ന കൊച്ചു ഗ്രാമത്തിൽ ഒരു പ്രാഥമിക ആരോഗ്യകേന്ദ്രം തുടങ്ങാൻ സ്ഥലം അനുവദിച്ചത് ഡി.ഡി സഭയാണ്. മെയിൻ റോഡിനോട് ചേർന്ന് കിടക്കുന്ന വിലമതിക്കുന്ന സ്ഥലം ഹെൽത്ത് സെന്റർ തുടങ്ങാൻ നൽകിയ നടപടിയിലൂടെ സഭ സാമൂഹികമായ പ്രതിബദ്ധത നിറവേറ്റുകയായിരുന്നു. ഇന്ന് ഈ സ്ഥാപനം കുടുംബ ആരോഗ്യ കേന്ദ്രം ആയി ഉയർത്തിയിട്ടുണ്ട്.

നമ്മുടെ ഗ്രാമത്തിലെ ആരോഗ്യ പരിപാലന സേവന സംവിധാനത്തിന്റെ അടിസ്ഥാനമായ അംഗൻവാടി  ഏറെകാലമായി സഭയുടെ കെട്ടിടത്തിലാണ് നടത്തിയിരുന്നത്. സ്വന്തമായി കെട്ടിടം നിർമിക്കാനുള്ള അവസരം ലഭിച്ചപ്പോൾ സ്ഥല ലഭ്യത വലിയ പ്രതിസന്ധി ഉണ്ടാക്കി. പുതിയ അംഗൻവാടി നിർമിക്കാൻ സ്ഥലം അനുവദിച്ചുകൊണ്ട് സഭ വീണ്ടും മാതൃകയായി.

ബഹു : ഹൈബി ഈഡൻ എം.പി യുടെ ഫണ്ടിൽ നിന്നും അനുവദിച്ച ഹൈ മാസ്ക് ലൈറ്റ് സ്ഥാപിക്കുന്നതിന് ഡി.ഡി. സഭയുടെ സ്ഥലം അനുവദിച്ചിട്ടുണ്ട്. ചേന്ദമംഗലം പഞ്ചായത്തിലെ ഏറ്റവും തിരക്കേറിയ കരിമ്പാടം ഹൈസ്കൂൾ ജംഗ്ഷനിൽ വാർഡ് മെമ്പർ ഷൈജ സജീവിന്റെ അഭ്യർത്ഥന പ്രകാരം സ്ഥലം വിട്ടുനൽകാൻ ഡി.ഡി. സഭ തയ്യാറായതുകൊണ്ടാണ് നാട്ടുകാരുടെ ഏറെക്കാലമായുള്ള ആവശ്യം നടപ്പാക്കപ്പെട്ടത്.

എല്ലാ വർഷവും ഡി.ഡി. സഭയുടെ നേതൃത്വത്തിൽ പരിസ്ഥിതി ദിന ആഘോഷം സംഘടിപ്പിക്കാറുണ്ട്. ഓണത്തോടനുബന്ധിച്ച് വിളവെടുക്കുന്ന രീതിയിൽ എല്ലാ വർഷവും ഡി.ഡി. സഭ ചെണ്ടുമല്ലി കൃഷി ക്ഷേത്ര വളപ്പിൽ നടത്തുന്നു.

പ്ലാസ്റ്റിക് നിർമാർജന പദ്ധതിയുടെ ഭാഗമായി വാർഡിലെ പ്ലാസ്റ്റിക്കുകൾ വേർതിരിക്കുന്നതിന് സഭ വക സ്ഥലം പഞ്ചായത്തിന് അനുവദിച്ചിട്ടുണ്ട്.